كان ياما كان ...
كان الجدع المعجباني ...
والأميرة بنت السلطان ...
.... لأ .... لأ .... كفاية كلام
لا جدع و لا بنوتة .... و إقفلوا الحدوتة
وكفاياكوا عيش في الأوهام
جدع إيه وبنت سلطان ليه
عيّشتونا في خيال أحلام
وإن الدنيا في خير وسلام
وياللا يابنى إتغطى ونام
وإحلم ببنت السلطان الحلوة ... وغني لها الغنوة
تلقاها طالة من الشباك ... مستنياك
وتاخدها على حصانك وتطير
وتعيشوا في تبات ونبات
وتخلفوا صبيان وبنات
لأ .... ملتوتة ....
مش دي الحدوتة ..
مش دي الدنيا كفاية حرام
وإوعوا تقولوا دا كان زمان
في سالف العصر والأوان
أيام العفاريت والجان
... لأ ...
دلوقتي زي زمان
نفس الغل ... نفس الحقد ... نفس الغيرة ..
نفس عليلة ونفس كبيرة
وكل واحد ماليان حيرة
وماعدتش فارقة
حتى لو نفسك إنكسرت
بتحط جبيرة
وإوعاكوا تقول دي تسالي
بنقولهالكم قبل النوم
هي صحيح تسالي بس بينا كل ساعة وكل يوم
ليه ؟
ليه تملونا براءة
دي مش دنيا حب وهوى
الدنيا عايزه حداءة
عايزة نصاحة وفهلوة
وسيبكوا من الشاطر حسن
بس الأول قولوا
إشمعنى حسن
ليه مايكونش حسين
.... لأ .... إحكولنا حكاية الشاطر
اللي بتراب الفلوس
هبش القناطر
ومتين فدان
وجرف الأرض وإداها عماير
وعالكل يدوس
خلونا نعرف مين فينا الناصح
ومين المنحوس
مين فينا هايعيش في تبات
وفهمونا .. يطلع إيه التبات
وإزاي نعيش فيه مرتاحين
لأ والأكادة .. وإحنا مخلفين
صبيان وبنات
طب ورونا جدعكوا المعجباني
يمكن نفهم إيه التبات
ولا بلاش ....
لحسن الكلمة في زوره تنحاش
بعد ما خد بنت السلطان
الحلوة الأمورة
وراح يدوّر عالتبات مالقاش
وإتورّط في صبيان وبنات
عايش دلوقتي مع الأوباش
.... إنسوا ....
إنسوا كل حواديتكوا البايتة
ملهاش عازة
حواديت عصرنا أحلى بكتير
حواديت طازة
وبدال صندوق الدنيا
عندنا ملايين من الصناديق
وحكاويها بحق وحقيق
بناكل في لحم بعضنا
وبنشرب الدم على غيار الريق
وإرحمونا من الأميرة الحلوة
بنت السلطان
وجدعكوا المعجباني أبو حصان و زمن الفرسان
وإنسوا كمان .. كان يا ما كان
لو عايزين تحكوا
إحكولنا عن زمنا
سيبكم من صندوقكوا البالي
صناديقنا شغالة طوالي
ثانية بثانية
حواديتها مليانة أخبار
بتعرفنا العيشة إزاي
من غير عفريت ولا مارد
ولا حتى الجان
إنتوا بتحكوا عن وهم الأوهام
عن الإنسان
وده في زماننا إنقرض
حل محله إبليس شيطان
في توب وملامح إنسان
يا علاء الدين ويا سندباد
خليكوا عن عقولنا بعاد
فات الميعاد
ولا شئ هاينعاد
لا سعاد ولا ياسمينه
سيبونا نعيش ليالينا
حتى ولو حزينة
بس نعيشها وإحنا فاهمين
إن مافيش مصباح يا علاء الدين
ولا مارد ولاتنين
غير بس من البني آدمين
اللي للدم مصاصين
عشان عربية وفيللا
خلاص بقى وفات اللي فات
مافيش عندنا لا تبات ولا نبات
إرموا حواديتكم
كفايانا حكايات .. كفايانا حكايات
منقووووووووووول
شكرا لمرورك طماطم
